ອຸນຫັດສະວິໄຊ
ນະໂມ ຕັດສັດຖູ !
ເອກັດສະມິງ ກິຣະ ສະມະເຍ ສັດຖາ ຕາວະຕິງສະພະວະເນ ວິຫະຣັນໂຕ ປາຣິດສັດຕະກະ ມູລັມຫິ ບັນທຸກັມພະລະສີລາສະເນ ນິສິຕີຕິ.
ໂພ ສາທະໂວ ດູຣາສັບປຸຣິສະທັງຫຼາຍ ກິຣະ ດັ່ງໄດ້ຍິນມາ ເອກັສມິງ ສະມະເຍ ໃນສມັຍ ນຶ່ງ ສັດຖາ ອັນວ່າສັບພຣະສັບພັນຍູເຈົ້າແຫ່ງເຮົາຕົນປະເສີດກ່ວາຄົນ ແລະເທວະດາທັງຫລາຍກໍສະເດັດປະທັບນັ່ງຢູ່ເຫນືອຫີນບັນທຸກັມພະລາສີລາອາດ ແທບເຄົ້າໄມ້ປາຣິກະຊາດໃນສະວັນຊັ້ນດາວະດິງ ຈິ່ງໄດ້ເທສນາພຣະອະພິທັມມາ ໗ ຄັມພີແກ່ເທວະດາທັງຫລາຍ ອັນມີສີຣິມະຫາມາຍາເທພະບຸດເປັນປະທານ ເພື່ອໃຫ້ບັນລຸທັມມະວິເສດ ເຊີ່ງມີມັກຜົນ ແລະນິບພານເປັນຕົ້ນ ອະຖະໃນກາລະເມື່ອນັ້ນ ຍັງມີເທວະບຸດຕົນນຶ່ງຊື່ວ່າ ສຸປະຕິດຖິຕະເທວະບຸດ ເປັນຜູ້ມີຣິດເຕຊະອານຸພາບຍິ່ງນັກໄດ້ສເວີຍທິພສົມບັດ ໃນວິມານຄໍາຫລັງນຶ່ງໃນສວັນຊັ້ນດາວະດິງທີ່ນັ້ນກໍມີແລ ສ່ວນວ່າສຸປະຕິດຖິຕະເທວະບຸດຕົນນັ້ນ ກໍບໍ່ຮູ້ສະພາວະ ອັນຈັກເຫມີດຈັກສ້ຽງອາຍຸແຫ່ງຕົນຫັ້ນແລ ອະຖະໂຂ ໃນກາລະຄັ້ງນັ້ນ ຍັງມີເທວະບຸດອີກຕົນນຶ່ງຊື່ວ່າ ອາກາສະຈາຣິນິເທວະບຸດ ເປັນຜູ້ຮູ້ຈັກຍັງສະພາວະອັນຈັກເຫມີດຈັກສ້ຽງອາຍຸ ແຫ່ງສຸປະຕິດຖິຕະເທວະບຸດດັ່ງນັ້ນ ຈິ່ງໄປບອກເຫດແກ່ ສຸປະຕິດຖິຕະເທວະບຸດ ວ່າດັ່ງນີ້ ໂພມາຣິສະ ດູຣາເຈົ້າຕົນຜູ້ຫາທຸກບໍ່ໄດ້ ໃນວັນຖ້ວນເຈັດນີ້ ເຈົ້າກູກໍຈັກຈຸຕິຕາຍຈາກສວັນເທວະໂລກທີ່ນີ້ແລ້ວ ຈັກໄດ້ໄປເກີດໃນອະເວຈີນະຣົກ ໄດ້ສເວີຍທຸກໃນນະ ຣົກມາກກ່ວາແສນປີນັ້ນແລ ດູຣາເທວະບຸດ ຄັນວ່າເຈົ້າກູຕາຍຈາກອະເວຈີນະຣົກນັ້ນແລ້ວຊ້ໍາເລົ່າ ຈັກໄດ້ໄປເກີດເປັນສັດເດັຽຣະສານ ໗ ຈໍາພວກ ໃນຊາດເປັນສັດນັ້ນແລສິ່ງແລຫ້າຮ້ອຍຊາດ ສ່ວນ ວ່າສຸປະຕິດຖິຕະເທວະບຸດ ເມື່ອຮູ້ເຫດອັນບໍ່ດີນັ້ນແລ້ວ ກໍມີຫົວໄຈອັນຫວັ່ນໄຫວສັ່ນສາຍໄປມາ ແລ້ວກໍຊົບເຊົາເຫງົາຢູ່ດັ່ງນັ້ນ ແລ້ວກໍຄະນິງໃນໃຈວ່າດັ່ງນີ້ ອຸປັດທະວະອົນຕາຍ ອັນມີສະພາວະປານນີ້ ເກີດມີແກ່ກູສັນນີ້ແລ້ວ ຈັກມີສິ່ງອັນໃດ ແລະບຸກຄົນໃດຈັກເປັນທີ່ຈັ້ງເພີ່ງແກ່ກູໄດ້ນີ້ຈານໍ ນ້ອຍບໍ່ນານທໍ່ໃດທ່ານກໍມາເຫັນບຸບພະນິມິດ ໕ ປະການ ບັງເກີດມີແກ່ຕົນກຼ່າວຄືວ່າ.
ຜ້າທິບເຄື່ອງຊົງກໍທມົ່ນຫມອງເສັຽ ນຶ່ງ
ດອກໄມ້ທິບກໍເປັນອັນຫ່ຽວແຫ້ງເສັຽ ນຶ່ງ
ເຫື່ອແລະໄຄໃນເນື້ອຕົນກໍໄຫລອອກ ນຶ່ງ
ທີ່ຢູ່ທີ່ນອນກໍເປັນອັນຮ້ອນຍິ່ງນັກ ນຶ່ງ
ຄັນທະຣົງຜ້າສະໃບເຂົ້າ ກໍຍີ່ງຮ້ອນກະວົນກະວາຍນຶ່ງ
ເມື່ອບຸບພະນິມິດ ໕ ປະການນີ້ ຜາກົດເກີດມີແກ່ເທວະບຸດ ແລ ເທວະທິດາອົງໃດ ເທວະບຸດ ແລ າເທວະທິດາອົງນັ້ນ ກໍຈະຕ້ອງຈຸຕິຈາກສວັນເທວະໂລກໂດຍທ່ຽງແທ້ບໍ່ຕ້ອງສົງສັຍ ສ່ວນວ່າ ສຸປະຕິດຖິຕະເທວະບຸດ ໄດ້ຮູ້ເຫດດັ່ງນັ້ນແລ້ວ ບໍ່ຢາກໄປສເວີຍຜົນກັມອັນຊົ່ວຮ້າຍ ຈິ່ງເຂົ້າສູ່ສໍາ ນັກຂອງພຣະຍາອິນໄຫວ້ແລ້ວກໍນັ່ງຢູ່ທີ່ສົມ ຄວນແຫ່ງຕົນ ຈິ່ງຂາບທູນເຫດຮ້າຍຕ່າງໆ ໃຫ້ຮູ້ແລ້ວ ຂໍເຈົ້າກູຈົ່ງເປັນທີ່ຈັ້ງທີ່ເພິ່ງແກ່ຜູ້ຂ້າແດ່ກໍຂ້າເຖີ້ນ ສັກໂກ ອັນວ່າພຣະຍາອິນ ຄັນໄດ້ຟັງຍັງຄໍາຂອງສຸປະຕິດຖິຕະເທວະບຸດນັ້ນແລ້ວ ຈິ່ງກຼ່າວວ່າຂຶ້ນຊື່ວ່າຄວາມຕາຍແລ້ວ ເຖິງເຮົາຜູ້ເປັນໃຫຍ່ໃນສວັນຊັ້ນດາວະດິງກໍຈິງຢູ່ ທຽນຍ່ອມແຕ່ບໍ່ອາດຈະຫ້າມ ແລະຕ້ານທານຄວາມຕາຍຂອງທ່ານໄດ້ແລ ທໍ່ເວັ້ນໄວ້ແຕ່ພຣະສັບພັນຍູເຈົ້າອົງດຽວນັ້ນແລ ທີ່ຈັ້ງທີ່ເພິ່ງແກ່ສັຕວະໂລກທັງມວນໄດ້ບັດນີ້ ສັດຖາ ອັນວ່າພຣະສັບພັນຍູເຈົ້າກໍປະທັບຢູ່ເຫນືອຫີນບັນທຸກັມພະລະສີລາອາດ ແທບເຄົ້າໄມ້ປາຣິ ກະຊາດ ຖ້າທ່ານຢາກຈະຣະງັບໂພຍພັຍອົນຕາຍແລ້ວຈົ່ງຈັດແຈງແຕ່ງເຄື່ອງກິຍາບູຊາມີດອກໄມ້ ທູບທຽນເປັນຕົ້ນ ເຮົາຈະພາໄປເຝົ້າພຣະພຸທເຈົ້າ ເພື່ອຈະໄດ້ທູນຖາມ ເຊິ່ງເຫດຮ້າຍຂອງທ່ານຕໍ່ ພຣະອົງ ແລ້ວກໍຈັກໄດ້ເປັນທີ່ເພິ່ງໃນກາລະບັດນີ້ແລ.
ສ່ວນວ່າ ສຸປະຕິດຖິຕະເທວະບຸດ ຄັນໄດ້ຟັງຍັງຄໍາຂອງພຣະຍາອິນ ດັ່ງນັ້ນ ກໍໄດ້ຈັດແຈງແຕ່ງເຄື່ອງກິຍາບູຊາ ຕາມຄໍາສັ່ງແລ້ວ ສັກໂກ ອັນວ່າພຣະຍາອິນ ກໍໄດ້ນໍາພາສຸປະຕິດຖິຕະເທວະບຸດໄປເຝົ້າພຣະພຸທເຈົ້າ ຄັນໄປເຖິງແລ້ວ ກໍໄດ້ຂາບໄຫ້ວ ນັ່ງຢູ່ທີ່ຄວນສ່ວນຂ້າງນຶ່ງແລ້ວ ຂາບທູນເຫດຮ້າຍທັງຫລາຍ ໃຫ້ພຣະພຸທເຈົ້າຮູ້ໂດຍຕະຫລອດ ຄັນແລ້ວພຣະຍາອິນກໍໄດ້ຂາບທູນໃຫ້ພຣະ ພຸທເຈົ້າ ຊົງສໍາແດງຍັງປຸບພະກັມຂອງສຸປະຕິດຖິຕະເທວະບຸດ ພະຄະວາອັນວ່າພຣະພຸທເຈົ້າຕົນປະເສີດ ກໍໄດ້ສໍາແດງຍັງປຸບພະກັມຂອງສຸປະຕິດຖິຕະເທວະບຸດຕົນນີ້ ເປັນຜູ້ມີຄວາມປະມາດ ເຫັນຜິດ ເປັນນາຍພາຍເນື້ອ ໄດ້ລັກເອົາລູກນົກຫນີຈາກພໍ່ແມ່ ແລ ມີຈິດໃຈແຂງກະດ້າງຂ້າພໍ່ຕີແມ່ ແລ ດ່າສະມະນະຊີພາມ ບໍ່ເຄົາຣົບຍໍາເກັງພຣະພິຂຸກສົງຜູ້ໄປຫາມາສູ່ເຖິງເຫັນຢູ່ກໍເຮັດດັ່ງບໍ່ຮູ້ບໍ່ເຫັນຫັ້ນແລ ຍ້ອນຜົນກັມອັນນີ້ແລ ສຸປະຕິດຖິຕະເທວະບຸດ ຈິ່ງຈັກໄດ້ບັງເກີດໃນນະຣົກ ສເວີຍຜົນກັມໃນນະຣົກປະມານແສນປີ ຄັນພົ້ນຈາກນະຣົກແລ້ວ ກໍຈັກໄດ້ບັງເກີດເປັນສັດເດຽຣະສານເຈັດຈໍາ ພວກ ຄື: ວ່າ ເປັນຮຸ້ງ ເປັນແຮ້ງ ເປັນເຕົ່າ ເປັນຫມູ ເປັນຫມາ ເປັນຄັນຫູູຫນວກ ແລະຕາບອດ ແລສີ່ງແລຫ້າຮ້ອຍຊາດ ດ້ວຍວິບາກ ແຫ່ງອະກຸສົນກັມທີ່ສຸປະຕິດຖິຕະເທວາບຸດ ໄດ້ກະທໍາມານີ້ແລ ມະຫາຣາຊະ ຂໍມະຫາລາດຈົ່ງຮູ້ຜົນກັມຂອງສຸປະຕິດຖິຕະເທວະບຸດ ດັ່ງກ່າວມາດ້ວຍປະການດັ່ງ ນີ້ແລ ສັກໂກ ອັນວ່າພະຍາອິນ ເມື່ອໄດ້ຮູ້ຍັງປຸບພະກັມ ຂອງສຸປະຕິດຖິຕະເທວະບຸດດັ່ງນີ້ແລ້ວ ຈິ່ງຂາບທູນໄຫວ້ພຣະສັບພັນຍູເຈົ້າວ່າ ອັນໃດແລ ຈັກເປັນທີ່ເພິ່ງ ທີ່ຮັກສາໃຫ້ເທວະບຸດຕົນນີ້ມີອາຍຸຫມັ້ນຢືນກໍຂ້າຈາ ພະຄະວາອັນວ່າສັບພັນຍູເຈົ້າກຼ່າວດັ່ງນີ້ ມະຫາຣະຊະ ດູຣາມະຫາຣາດ ເອໂກ ທັມໂມ ຍັງມີທັມດວງນຶ່ງ ອຸນຫັດສະວິຊະໂຍນາມມະ ຊື່ວ່າ ອຸນຫັດສະວິໄຊ ເປັນທັມອັນອຸດົມຍິ່ງ ຈິ່ງໃຫ້ເທວະບຸດຕົນນີ້ ຮຽນເອົາທັມດວງນີ້ໃຫ້ໄດ້ຈື່ຈໍາໄວ້ ແລະ ປະຕິບັດດ້ວຍ ກາຍ ວາຈາ ແລະໃຈ ໃຫ້ບໍລິສຸດເຖີ້ນ ກໍຈັກເປັນທີ່ຈັ້ງທີ່ເພິ່ງ ຫ້າມບໍ່ໃຫ້ຕາຍໃນວັນຖ້ວນເຈັດນັ້ນແລ ພະຄະວາ ອັນວ່າ ພຣະສັບພັນຍູເຈົ້າກໍສໍາແດງຍັງຄາຖາອຸນຫັດສະວິໄຊວ່າດັ່ງນີ້:
ອັດຖິ ອຸນຫັດສະວິຊະໂຍ ທັມໂມ ໂລເກອະນຸດນະໂຣ ສັບພະສັດຕະຫິຕັດຖາຍະ ຕັງ ຕະວັງຄັນຫາຫິ ເທວະເຕ ປະຣິວັດເຊ ຣາຊະທັນເດ ອະມະມຸດເສຫິປາວະເກ ພະຍັກເຄ ນາເຄ ວິເສພູເຕອະກາລະມະຣະເນນະ ວາ ສັບພັສມາ ມະຣະນາມຸດໂຕຖະເປຕວາ ກາລະມາຣິຕັງ ຕັດເສວະ ອະນຸພາເວນະໂຫຕຸ ເທໂວ ສຸຂີ ສະທາ ລິກຂິດຕັງ ຈິນຕິຕັງ ປູຊັງທາຣະນັງ ວະຈະນັງ ຄະຣຸງ ເຕສັງ ເທສະນັງ ສຸຕວາ ຕັດສະ ອາຍຸ ປະວັດທະຕິຕິ.
ເທວະເຕ ດູຣາເທວະດາທັງຫລາຍ ທັມອັນຊື່ວ່າອຸນຫັດສະວິໄຊນີ້ ເປັນຍອດແຫ່ງທັມທັງ ຫລາຍ ແລະເປັນປະໂຫຍດແກ່ສັຕວະໂລກທັງມວນ ທ່ານຈົ່ງຮຽນເອົາຍັງທັມອັນນີ້ແລ້ວ ສູດທຸກເຊົ້າຄ່ໍາຄືນວັນຍ່ອມຫ້າມເສັຽໄດ້ ເຊິ່ງພັຍອັນຕະຣາຍທັງປວງຈະເກີດຂຶ້ນ ແຕ່ພູດຜີປີສາດເສືອ ໂຄ່ງ ເສືອເຫລືອງ ງູໃຫຍ່ ງູນ້ອຍ ແຮດ ຊ້າງ ຫມູ່ສັດພິດຮ້າຍແລ ທ່ານທັງຫລາຍກໍຈະບໍ່ຕາຍຍ້ອນຢາພິດທຸກຊະນິດ ນອກຈາກສ້ຽງອາຍຸແລ້ວກໍຈິ່ງຕາຍແທ້ແລ.
ສັກກັຕວາພຸດທະຣະຕະນັງ ໂອຖະສັງ ອຸດຕະມັງ ວະຣັງ ຫິຕັງເທວະມະນຸດສານັງ ພຸດທະເຕເຊນະ ໂສດຖິນາ ນັດສັນຕຸປັດທະວາ ສັບເພ ທຸກຂາ ວຸປະສະເມນຕຸ ເຕ.
ອັນນຶ່ງ ຜູ້ໃດໄດ້ບູຊາພຣະຣັຕນະໄຕຣ ທັງ ໓ ປະການຄື: ພຣະພຸທເຈົ້າ ພຣະທັມມະເຈົ້າແລ ພຣະສັງຄະເຈົ້າ ຜູ້ນັ້ນຈະເຫມືອນດັ່ງໄດ້ກິນຢາອັນປະເສີດມີອາຍຸຫມັ້ນຍືນ ຈັກເປັນຜູ້ພົ້ນຈາກທຸກ ໂສກ ໂຣກພັຍອັນຕະຣາຍທັງປວງ ຍ້ອນອານຸພາບຂອງຄາຖາອຸນຫັດສະວິໄຊ ແລະຄຸນຂອງພຣະ ຣັຕນະໄຕຣນີ້ ຈະຄຸ້ມຄອງປ້ອງກັນໃຫ້ຊີວິດຂອງທ່ານພົ້ນຈາກອັນຕະຣາຍ ມີອາຍຸຫມັ້ນຍືນໄດ້ ຂໍໃຫ້ທ່ານທັງຫລາຍຈົ່ງພາກັນປະຕິບັດຮັກສາໄວ້ຢ່າໃຫ້ຂາດເຖີ້ນ.
ເທສະນາປະຣິໂຍສາເນ ໃນເມື່ອແລ້ວຣົສທັມມະເທສະນາ ເທ ວະຕາໂຍ ອັນວ່າ ເທວະດາທັງຫລາຍອັນມີ ພຣະອິນ ເປັນປະທານ ກໍໄດ້ເຖິງທັມມະວິເສດມີປະເພດກຼ່າວຄືວ່າ ມັກແລະຜົນເປັນອັນມາກແລ ສ່ວນວ່າສຸປະຕິດຖິຕະເທວະບຸດນັ້ນ ກໍໄດ້ນ້ອມຈິດໃຈໄປໃນທັມມະວິເສດ ກໍໄດ້ກັບເພດເປັນອັດຕະພາບໃຫມ່ ມີກາຍອັນຜ່ອງໃສ ແລະມີອາຍຸຍືນຍາວຕະກຫລອດໄປຈົນເຖິງສມັຍຂອງພຣະພຸທເຈົ້າ ຊົງພຣະນາມວ່າ ພຣະສີອະຣິຍະເມດໄຕຍ ອົງຈະໄດ້ລົງມາຕັດຂ້າງຫນ້ານັ້ນແລ ຈິ່ງຈະໄດ້ຈຸຕິລົງມາສູ່ມະມຸສໂລກ ກໍຈັກໄດ້ເປັນພຣະອະຣະຫັນ ຂີນາສາວົກອົງນຶ່ງກໍມີແລ.
ອຸນຫັດສະວິຊະຍະວັນນະນາກະຖາ ອັນວ່າ ກິຍາ ອັນກຼ່າວຍ້ອງຍໍຍັງ ອຸນຫັດສະວິໄຊ ນິດຖິຕາ ກໍສະເດັດບໍຣະບວນຄວນແລ້ວທໍ່ນີ້ນກ່ອນແລ.
ไม่มีความคิดเห็น:
แสดงความคิดเห็น